Les í USA
Útbúgving
USA hevur eitt stórt og fjølbroytt úrval av universitetum og colleges. Ein bachelorútbúgving tekur vanliga fýra ár og sameinir høvuðsfakið, major, við breiðari fakum. Byrja fyrireikingina í góðari tíð; EducationUSA mælir til at kanna møguleikarnar 12–18 mánaðir áðrenn lestrarbyrjan.
Brúka EducationUSA til at leggja lesturin til rættis. Tú kanst eisini finna útbúgvingar við BigFuture hjá College Board og Peterson’s. Í USA merkir college ofta hægri útbúgving, ikki miðnám. Kanna bæði fakligt innihald, kostnað og góðkenning.
Søk inn á hægri útbúgving
Hvør útbúgvingarstovnur ásetur sína umsóknartilgongd. Umsóknin kann fevna um prógv, próvtalsyvirlit, enskar týðingar, viðmæli og ein persónligan tekst. Royndir og onnur krøv eru ymisk; fylg leiðbeiningini hjá universitetinum og EducationUSA.
1. Vel viðkomandi colleges ella universitet og kanna góðkenning.
2. Skráset umsóknarfreistir og serligar freistir fyri fíggjarliga hjálp.
3. Fá prógv, enskar týðingar og viðmæli klár.
4. Kanna, um tú skalt taka málroynd ella aðra upptøkuroynd.
5. Send umsókn og kravd fylgiskjøl; goym kvittanir.
6. Tá tú ert upptikin, fyrireikar tú fígging, bústað og lestrarvisum.
Umsóknarfreistir
- Freistir eru ymiskar: Nógvar bachelorumsóknir skulu latast inn millum november og januar til lestrarbyrjan komandi heyst. Aðrar freistir og upptøkur finnast. Kanna altíð dagfesting, klokkuslett og tíðarøki hjá universitetinum.
Legg merki til: Masterútbúgvingar, listarligar útbúgvingar og ávísar aðrar útbúgvingar kunnu hava aðrar freistir. Kanna tí altíð síðuna hjá útbúgvingarstaðnum.
Finn bústað
Í teimum størstu lestrarbýunum kann vera trupult at finna bíligan bústað. Søk tí so tíðliga sum gjørligt, eisini áðrenn tú hevur fingið endaligt svar um upptøku, um bústaðarskipanin loyvir tí.
Spyr universitetið um student housing og dormitories á campus, og kanna, um bústaður ella matarskipan er kravd fyrsta árið. Samanber samlaða kostnaðin við privata leigu og kanna, um bústaðurin er tøkur í frítíðunum. Les EducationUSA um lívið á campus.
Føroysk prógv og málkrøv
Tað einstaka universitetið metir um føroyska miðnámsprógvið og fakligu fortreytirnar. Spyr, um prógv og próvtalsyvirlit skulu sendast beinleiðis frá miðnámsskúlanum, og um krav er um váttaða týðing ella uttanhýsis prógvameting.
Til útbúgvingar á enskum kann útbúgvingarstaðið krevja skjalprógv fyri enskkunnleika, til dømis IELTS ella TOEFL.
Fíggjarviðurskifti
Kostnaðurin er sera ymiskur. Bið um universitetets cost of attendance, sum umframt tuition og fees tekur hædd fyri bústaði og øðrum liviútreiðslum. Samanber samlaða kostnaðin eftir møguligan stuðul, heldur enn bert skúlagjaldið. Sí EducationUSA um fígging.
Kanna SU-góðkenning og tín rætt til stuðul, áðrenn tú bindur teg til útbúgvingina. Les vegleiðingina um fígging av lestri.
Spyr Studna um ÚSUN, stuðul til skúlagjald og ferðastudning. Treytir og umsóknarfreistir skulu kannast fyri títt lestrarár.
Kanna scholarships og financial aid til international students. Stuðul kann byggja á faklig avrik, fíggjarligan tørv ella ítrótt, men treytirnar eru ymiskar. Fá greitt at vita, hvussu leingi stuðulin varir, og hvørji avrik krevjast fyri at varðveita hann.
Ger eina fíggjarætlan fyri allan lesnaðin. Tak skúlagjald, bústað, mat, flutning, bøkur, trygging, visum og ferðir við. Set eisini pening av til óvæntaðar útreiðslur og broytingar í gjaldoyrakursinum.
Kanna serliga, um hjálpin eisini fevnir um trygging, bústað og mat, og um tú skalt søkja av nýggjum hvørt ár. Fá eitt skrivligt fíggingaryvirlit, áðrenn tú tekur endaliga avgerð um lestrarstað.
Visum, trygging og skattur
Til vanligan universitetslestur er F-1 vanliga viðkomandi; til ávísan skiftislestur kann J-1 vera rætta visumið. Fyrst skalt tú verða upptikin á einum stovni, sum kann taka ímóti altjóða lesandi. Sí EducationUSA um lestrarvisum.
Universitetið sendir neyðuga skjalið til visumumsóknina, vanliga I-20 til F-1 ella DS-2019 til J-1. Fylg síðan galdandi umsóknarleiðbeiningum frá amerikonsku myndugleikunum. Ferðaloyvi til vitjan kemur ikki í staðin fyri rætt lestrarvisum.
Avgreið heilsutryggingina, áðrenn tú ferð. Kanna krøvini hjá universitetinum og hvat tryggingin fevnir um. EducationUSA hevur ein fyrireikingarlista til fráferð.
Arbeiðsloyvi og arbeiðstreytir fylgja visumstøðuni. Spyr international student office, áðrenn tú tekur arbeiði ella starvsvenjing, og bið um vegleiðing um amerikanska skattauppgávu. Rokna ikki við, at eitt lestrarvisum gevur frítt arbeiðsloyvi.
Skattur og arbeiði í Føroyum
Spyr TAKS um tíni skattaviðurskifti og møguleikan at varðveita fulla skattskyldu í Føroyum, meðan tú lesur uttanlands.
Heintar leinkjur
Fá hjálp og vegleiðing
EducationUSA og Fulbright Denmark veita vegleiðing um lestur í USA. International student office á universitetinum hjálpir við praktiskum viðurskiftum. Stuðulsskipanir hjá Fulbright hava serligar treytir um millum annað útbúgvingarstig og ríkisborgararætt.
Hevur tú spurningar um útbúgvingarval, upptøkukrøv ella umsóknina, ert tú vælkomin at seta teg í samband við Vegleiðingarstovuna á vegleiding@uvs.fo
Kanna accreditation hjá bæði stovni og, tá viðkomandi, útbúgving. At skúlin kann taka ímóti altjóða lesandi er ikki tað sama sum faklig góðkenning. EducationUSA vísir til almennar góðkenningarskráir. Ætlar tú at arbeiða í einum lógarreguleraðum yrki í Føroyum, mæla vit til at kanna autorisatión, áðrenn tú velur.