Les í Letlandi
Útbúgving
Lettland hevur universitet og universities of applied sciences við enskmæltum bachelor- og masterútbúgvingum, millum annað innan vinnu, tøkni, heilsu og samfelagsvísindi. Study in Latvia hevur almenna kunning.
Kanna altíð innihald, undirvísingarmál, góðkenning, upptøkukrøv og samlaða kostnaðin á heimasíðuni hjá sjálvum útbúgvingarstaðnum.
Søk inn á hægri útbúgving
Tú søkir vanliga beinleiðis til útbúgvingarstaðið. Universitetið metir prógvið og kann krevja net-samrøðu, upptøkuroynd, góðkenda týðing ella váttan frá lettiska Academic Information Centre.
1. Finn útbúgvingina og kanna upptøkukrøv og undirvísingarmál.
2. Kanna, hvør umsóknarskipan skal brúkast.
3. Fyrireika prógv, próvtalsavrit, samleikaprógv og møguligar góðkendar týðingar.
4. Legg øll kravd skjøl við umsóknini.
5. Kanna, um útbúgvingin krevur málroynd, portfolio, samrøðu ella upptøkuroynd.
6. Goym kvittanina og fylg við boðum frá útbúgvingarstaðnum.
Umsóknarfreistir
- Freistirnar eru ymiskar: Stovnarnir hava egnar freistir, ofta um várið ella summarið til heystbyrjan. Søkir tú heilsuútbúgving ella útbúgving við avmarkaðum plássum, eigur tú at byrja fyrr.
Legg merki til: Masterútbúgvingar, listarligar útbúgvingar og útbúgvingar við avmarkaðum tali av plássum kunnu hava serliga mannagongd og fyrru freist.
Finn bústað
Mong universitet bjóða lestrarheim, og privat leiga er eisini vanlig. Í Riga er eftirspurningurin størri, so søk tíðliga og kanna leigusáttmálan væl.
Kanna fyrst bústaðartænastuna hjá universitetinum og byrja leitina tíðliga. Ver varin við falslýsingum, og vátta bústaðin, útleigaran og leigusáttmálan, áðrenn tú rindar depositum.
Føroysk prógv og málkrøv
Útbúgvingarstaðið metir føroyska miðnámsprógvið og avger, um tú lýkur almennu og fakligu upptøkukrøvini. Tað kann verða kravt, at prógv og próvtalsavrit verða týdd av góðkendum týðara ella fáa serliga váttan.
Til enskmæltar útbúgvingar verður vanliga kravt enskt á B2-stigi og møguliga IELTS, TOEFL ella samrøða. Lettiskmæltar útbúgvingar krevja prógv í lettiskum.
Fíggjarviðurskifti
Enskmæltar útbúgvingar hava vanliga lestrargjald, sum er ymiskt eftir stovni og faki. Heilsuútbúgvingar kunnu kosta munandi meira enn aðrar útbúgvingar.
Tú kanst søkja um danskan SU til eina heila útbúgving uttanlands, um tú lýkur treytirnar og útbúgvingin er góðkend til SU. Kanna útbúgvingina og søk í góðari tíð á SU í útlandinum.
Til ávísar masterútbúgvingar kanst tú søkja um útlandastipendium til part av útbúgvingargjaldinum. Kanna treytirnar á su.dk.
Ger eina fíggjarætlan við lestrargjaldi, umsóknargjaldi, bústaði, trygging, ferðing og dagligum útreiðslum.
Kanna eisini, um útbúgvingarstaðið ella landið hevur legat og stuðul til altjóða lesandi.
Kanna, um tú hevur rætt til føroyskan ferðastuðul ella annan stuðul, áðrenn tú bindur teg til stórar útreiðslur.
Skattur
SU er skattskyldug inntøka. Hvussu hon verður skattað, veldst millum annað um, hvar tú ert skattskyldug/ur, meðan tú lesur í Lettlandi.
Flyting til Lettlands kann ávirka skattaskyldu, frádrátt og skylduna at lata upplýsingar til skattamyndugleikarnar.
Arbeiðir tú við síðuna av lesnaðinum, kanst tú fáa skyldu at skráseta teg og rinda skatt í lestrarlandinum.
Boða TAKS og aðrar viðkomandi myndugleikar frá flytingini og fá greiðu á skattaviðurskiftunum.
State Revenue Service hevur almenna kunning um skatt í Lettlandi.
Fá ítøkiliga vegleiðing, um tú hevur inntøku úr fleiri londum ella ert í iva um skattskylduna.
Heintar leinkjur
Fá hjálp og vegleiðing
Study in Latvia hevur kunning um útbúgvingar og lestrarlív. Endaligt svar um upptøku, prógv, málkrøv og skjøl fært tú frá útbúgvingarstaðnum.
Hevur tú spurningar um útbúgvingarval, føroyska prógvið ella umsóknina, ert tú vælkomin at seta teg í samband við Vegleiðingarstovuna á vegleiding@uvs.fo.
Almenn kunning: Study in Latvia
Umsókn og upptøkukrøv: Les meira