Les í Spania
Útbúgving
Í Spania eru bæði almenn og privat universitet. Flestu bachelorútbúgvingar verða undirvístar á sponskum, men tú finnur eisini útbúgvingar á enskum – serliga á masterstigi. Á UNEDasiss finnur tú kunning um upptøku hjá umsøkjarum við útlendskum prógvi.
Kanna altíð innihald, mál, kostnað og upptøkukrøv á heimasíðuni hjá universitetinum. Krøvini kunnu vera ymisk millum universitet og millum sponsku landslutirnar.
Søk inn á hægri útbúgving
Tá tú søkir bachelorútbúgving í Spania við føroyskum miðnámsprógvi, skalt tú vanliga fáa prógvið mett gjøgnum UNEDasiss. Universitetið ella landsluturin kann harumframt krevja serstakar PCE-upptøkuroyndir ella aðra skráseting.
1. Finn útbúgvingina og kanna undirvísingarmál og upptøkukrøv.
2. Spyr universitetið, hvørja UNEDasiss-góðkenning tú skalt hava.
3. Fyrireika prógv, próvtalsavrit og møguligar týðingar.
4. Søk um góðkenning og møguligar PCE-royndir í góðari tíð.
5. Søk síðani eftir mannagongdini hjá universitetinum ella landslutinum.
6. Goym kvittanir og fylg við boðum frá universitetinum.
Umsóknarfreistir
- Freistirnar eru ymiskar: Tær veldast um universitet, landslut og útbúgving. Freistir til UNEDasiss, PCE-royndir og sjálva universitetsumsóknina eru ikki altíð tær somu. Kanna tí allar freistir á heimasíðuni hjá útbúgvingarstaðnum.
Legg merki til: Masterútbúgvingar og privat universitet hava ofta sína egnu umsóknarskipan og sínar egnu freistir.
Finn bústað
Universitetini hava ofta kunning um lestrarheim, residencias universitarias, og privat kamar ella íbúðir. Í stórbýum sum Madrid og Barcelona kann bæði kostnaður og eftirspurningur vera høgur, so far undir bústaðarleitina tíðliga.
Kanna fyrst bústaðarkunningina hjá universitetinum. Ver varin við falslýsingum: flyt ikki stóra upphædd, fyrr enn tú hevur váttað útleigaran, bústaðin og treytirnar í leigusáttmálanum.
Føroysk prógv og málkrøv
Føroyska miðnámsprógvið skal vanliga metast, áðrenn tú kanst søkja bachelorútbúgving. UNEDasiss kann gera eina góðkenning og umrokna próvtøl; universitetið avger tó endaliga, hvørji skjøl og hvørjar royndir krevjast.
Til spanskmæltar útbúgvingar kann verða kravt prógv í sponskum, og í ávísum landslutum kann partur av undirvísingini vera á katalanskum, baskiskum ella galisiskum. Til enskmæltar útbúgvingar kann universitetið krevja IELTS, TOEFL ella annað málprógv.
Fíggjarviðurskifti
Útbúgvingargjaldið er ymiskt. Á almennum universitetum veldst gjaldið millum annað um landslut og tal av ECTS-stigum; privat universitet eru vanliga munandi dýrari. Kanna altíð samlaða árliga kostnaðin hjá universitetinum.
Tú kanst søkja um danskan SU til eina heila útbúgving uttanlands, um tú lýkur treytirnar og útbúgvingin er góðkend til SU. Kanna útbúgvingina og søk í góðari tíð á SU í útlandinum.
Til ávísar masterútbúgvingar kanst tú eisini søkja um útlandastipendium til part av útbúgvingargjaldinum. Treytirnar eru á su.dk.
Ger eina fíggjarætlan við útbúgvingargjaldi, bústaði, trygging, ferðing og dagligum útreiðslum. Kostnaðurin er nógv ymiskur millum býir.
Kanna eisini, um tú hevur rætt til føroyskan ferðastuðul ella annan stuðul, og um universitetið hevur legat ella afsláttarskipanir.
Søk stuðul og vátta fíggingina, áðrenn tú bindur teg til kostnaðarmiklan bústað ella rindar stórt innskrivingargjald.
Skattur
SU er skattskyldug inntøka. Hvussu hon verður skattað, veldst millum annað um, hvar tú ert skattskyldug/ur, meðan tú lesur í Spania.
Flyting til Spania kann ávirka skattaskyldu, frádrátt og skylduna at lata upplýsingar til skattamyndugleikarnar. Tað er serliga týdningarmikið, um tú arbeiðir við síðuna av lesnaðinum.
Boða TAKS og aðrar viðkomandi myndugleikar frá flytingini og fá greiðu á skattaviðurskiftunum, áðrenn lesturin byrjar.
Fært tú danskan SU, skalt tú kanna á su.dk og hjá skattamyndugleikunum, hvussu skattakort og búseta skulu skrásetast.
Spanska skattastovan eitur Agencia Tributaria.
Skattareglur eru treytaðar av persónligum viðurskiftum. Fá tí ítøkiliga vegleiðing, um tú ert í iva.
Heintar leinkjur
Fá hjálp og vegleiðing
UNEDasiss hevur kunning um meting av útlendskum prógvum, PCE-royndir og umsóknargongdina. Sjálvt universitetið er tó rætti staðurin at fáa endaligt svar um upptøkukrøv.
Hevur tú spurningar um útbúgvingarval, føroyska prógvið ella umsóknina, ert tú vælkomin at seta teg í samband við Vegleiðingarstovuna á vegleiding@uvs.fo.
Almenn kunning: UNEDasiss
Spanska útbúgvingarmálaráðið: Educación