Les í Sveis
Útbúgving
Á swissuniversities kanst tú lesa um universitet, upptøku og hægri lestur í Sveis. Landið hevur universitet, teknisk universitet og universities of applied sciences.
Útbúgvingar verða bodnar á týskum, fronskum, italskum og í ávísum førum á enskum – serliga á masterstigi. Kanna altíð upplýsingar hjá sjálvum lærustovninum.
Søk inn á hægri útbúgving
Tú søkir vanliga beinleiðis hjá universitetinum. Hvør lærustovnur hevur sína egnu umsóknarskipan og ger sjálvur av, um tú lýkur upptøkukrøvini. Umsóknin fevnir vanliga um prógv, karakterblað, málprógv og møguliga góðkendar umsetingar.
1. Finn útbúgvingina og kanna undirvísingarmálið.
2. Kanna krøvini til føroyska miðnámsprógvið.
3. Fyrireika prógv, karakterblað og umsetingar.
4. Send umsóknina beinleiðis til universitetið.
5. Kanna uppihald, trygging, bústað og fígging eftir upptøku.
Umsóknarfreistir
- Freistirnar eru ymiskar eftir universiteti, útbúgving og um tú skalt søkja um uppihaldsloyvi. Fleiri universitet hava freist um várið til heystbyrjan. Kanna altíð ítøkiligu freistina hjá lærustovninum.
Legg merki til: Útbúgvingar sum læknafrøði hava serlig og avmarkað upptøkukrøv, og atgongdin hjá útlendskum umsøkjarum kann vera avmarkað.
Finn bústað
Tað kann vera dýrt og trupult at finna bústað í stórum sveisiskum lestrarbýum. Universitetini hava ofta bústaðartænastu ella leinkjur til næmingaheim og privatan leigumarknað.
Søk tíðliga, kanna leigusáttmála og depositum væl og rinda ikki pening, fyrr enn tú hevur váttað, at útleigarin og bústaðurin eru álítandi.
Føroysk prógv og málkrøv
Hvørt universitet metir sjálvt útlendsk prógv. Á swissuniversities kanst tú síggja vegleiðandi upptøkukrøv eftir landi, men universitetið ger endaligu avgerðina.
Tú skalt vanliga skjalprógva førleika í undirvísingarmálinum. Kravið kann vera týskt, franskt, italskt ella enskt málprógv, alt eftir útbúgvingini.
Fíggjarviðurskifti
Sveis hevur høgan livikostnað. Almenn universitet hava vanliga hálvársgjald, men upphæddin er ymisk, og summir lærustovnar krevja hægri gjald frá útlendskum lesandi.
Tú kanst søkja Studna um stuðul til góðkendan hægri lestur uttanlands. Kanna treytirnar í góðari tíð.
Ger eina realistiska fíggjarætlan við skúlagjaldi, bústaði, depositum, kravdari sjúkratrygging, ferð, bókum og dagligum útreiðslum.
Kanna styrkir hjá universitetinum og Swiss Government Excellence Scholarships.
Arbeiði við síðuna av lestrinum kann vera treytað av uppihaldsloyvi og reglum í kantonini.
Fá fíggingina váttaða, áðrenn tú bindur teg til dýran bústað ella skúlagjald.
Skattur
Arbeiðir tú undir lestrinum í Sveis, skalt tú kanna reglur um skatt, sosial gjøld og trygging í kantonini, har tú býrt.
Skattaviðurskiftini kunnu vera treytað av uppihaldstíð, inntøku og tilknýti til Føroya.
Boða TAKS frá flytingini og fá vegleiðing um tína føroysku skattskyldu.
Kantonalu skattamyndugleikarnir kunnu upplýsa, hvussu arbeiðsinntøka og møguligur kelduskattur verða viðgjørd.
Skattskylda
Les meira hjá TAKS og á ch.ch. Goym øll lønar- og skattaskjøl.
Hentar leinkjur
Fá hjálp og vegleiðing
Admissions- ella International Office á universitetinum kann svara um upptøku, prógv, málkrøv og praktisk viðurskifti.
Hevur tú spurningar um útbúgvingarval ella umsókn, kanst tú seta teg í samband við Vegleiðingarstovuna á vegleiding@uvs.fo.
Kanna eisini almennu kunningina hjá swissuniversities og á ch.ch.